Shillong, 11 Jylliew 2025 – Ka Kashari ka ai por 8 sngi ia ki Pulit ia ban pynlong ia ka jingtohkit ia ki briew 5 ngut kiba la shah pynngat ha ka jingshah pyniap ha Sohra.Ha ka jingtian bishar ka District Session Judge ha Iing Kashari ha Shillong ka la ai 8 sngi ia ka jingkhang ha kti Pulit ban tohkit ia ki briew kiba shah pynngat ha ka jingshah pyniap u Raja Raghuvanshi, u nongwan jngohkai na Indore, uba la iap ha Sohra. Kane ka remand ka ai lad ia ki Pulit ban pynlong jingtohkit bniah bad wad jingtip na ki nongpyniap ha ka por ba shong ha jingkhang.
Haba kren sha ki nongthoh khubor, u Additional SP jong East Khasi Hills, u Ashish (IPS) u la pyntip shai ba:
“Ki la shah pynkhang ha kti Pulit shipor 8 sngi. Ka jingtohkit ka la iaid shakhmat bad ngi la sdang ban tei ia ka dur kaba kham khraw jong kane ka jingjia,” la ong u Ashish.
Haba kylli la ki Pulit kin pynlong crime scene recreation , u la ong:
“Ka crime scene recreation ka long kaba lah ban iarap, hynrei ym dei kaba donkam palat. Lada ha ka por ba ngi pynlong jingtohkit ngi shem ba ka long kaba donkam, ngin pynlong. Ym pat lah ban batai shai lano ngin leh ïa kane—kan shong ha ka bynta jong ka jingdonkam.”
Haba kylli la ka Sorkar pulit ka tip shai lano bad kumno kin iaid shakhmat:
“Ka sienjam ba nyngkong eh ka long ban tohkit ia ki nongpyniap kiba la shah kem, khnang ban sngewthuh shai ia ka jingpynbeit jong kane ka kam—kano ka bynta ba long ka plan, bad mano ba don bynta ha ka. Ngi don ka jingmut shaphang kaba jia, hynrei mynta ngin pynshisha lyngba ka jingtohkit bad ki jingkren jong ki.”
Haba la kylli la uno uno na ki san ngut ba shah kem u la ai jingkren ne pdiang ia ka kam:
“Ngi la ioh ia uwei na ki ba shah kem ha ka por 1:30 shiteng synnia mynta ka step, katba kiwei pat ki la poi ha ka por 11:00 haduh 11:30 AM. Namar ba ngi la shu khmih shuwa ban rah sha kashari, ym pat don por ba biang ban pynlong ka jingtohkit bniah.”
U Ashish u la ai ka jingiaroh ruh ia ki paidbah bad ki bor jong ka jylla: “Ki paidbah bad ka sorkar Meghalaya ki la ieng ha syndah jong ngi naduh kaba sdang. Wat haba ki lad pathai khubor na bar jylla ki pyrshah, hynrei ka jingshaniah na ki paidbah ka long kaba khraw. Ngin bteng ban shakri hok ia ka jylla.”
Shaphang ka jaka jong ka jingshah pyniap, u la ong:“Na ka jingtohkit kaba nyngkong, ngi sngewthuh ba ka jingjia ka la jia ha katei ka thain ba la lap ia u met iap. Ki khubor ba bniah kin paw shuh shuh ha ki sngi ban wan.”