Shillong:
Ka Tnad Meghalaya Urban Development Authority (MUDA) kaba la kner jingiarap ia ki nongdie madan da kaba ai jaka shong dukan ha Khyndai Lad, ka la mad ka jingduhnong kaba kot T. 2,610,000 shisngi na ka jingbym pynlut ia ka jaka pynieng kali ha ki ar mala ba la shna kyrpang na ka bynta ki nongdie madan.
Ka jingduhnong ka mih na ka jingbym lah ban lum pisa na ka bai pynieng kali ha ki mala parking, kiba long kumne: ki kali
Private: T.20 shi kynta Arshaka T. 10 shi kynta, Commercial Taxi: T. 30 shi kynta
Commercial Tourist : T.100 shi kynta
Pick-up Truck: T.150 shi kynta
Lada kheiñ kyllum da ki 18 kynta ba iaid bha ka iew, ka jingduhnong kaba mih ha ka shisngi ka long T. 2,610,000. Ka jingrung ki kali ha kitei ki mala ka long da ki 500 tylli, ha kaba kawei ka mala ka lah ban rung haduh 250 tylli.
Ka Sorkar da ka mynsiem kmie ka la kner la ka kti ban kyrshan ia ki nongdie madan, da kaba ai ei jaka shong dukan khlem da siew bai jaka eiei. Ka la ai ruh baiseng ha ki san bnai ba nyngkong, kaba long T. 10,000, T. 5,000 haduh T. 2,000 katkum ka bynta.
Hynrei, ka long kaba sngewsih ba ki nongdie madan kim treh ban leit sha kitei ki jaka, watla ka jingiarap ka long ba shisha eh. Ka Tnad MUDA ka la dep shna parking ha mala ba shapoh bad shna kyrpang ha khmat SBI (State Bank of India) hynrei kim treh ban shong, namar ki ieid ban shong ha khmat MUDA ha surok, ba bun briew bad ba ieng bha.
Na ka liang ki nongmihkhmat ka sorkar kum u Bah Paul Lyngdoh bad Bah Prestone Tynsong ki la ong ba lada ki nongdie madan ki kloi ban shim ia ka jaka ba la ai da ka sorkar, ka sor kan khuid, ka surok kan lait jingpynieng pathar, bad u paidbah ruh un kmen ba la lait na ka jingpynwit.
Wat ki bor ka aiñ kin suk ban pyniaid lada ki nongdie madan ki kohnguh. Hynrei ka Sorkar ka mad jingeh haba ka Tnad Pulit kam tip mano ban peit bad mano ban pynkiar kali bad briew.
Ka jingshah ban pynieng pathar ha surok ka buh jingma, ka pynduh jingsuk bad ka roi ka par jong ka sor. Ka jingdon jong ki nongdie madan palat kylleng surok ka wanrah jingklumar bad jingeh ia u paidbah.
Kumta, haba peit na baroh ki liang, ka jingkyrpad ia ki nongdie madan ka long ba kin sngewthuh ia ka jingangnud jong ka sorkar bad kin shim kabu ia ki jaka ba la pynkhreh na ka bynta ki, khnang ba kan don ka jingkylluid bad jingbit jingbiang ha ka sor Shillong.