Shillong, 7 Naitung 2025:
U Myntri ka tnad Urban Affairs, Bah Paul Lyngdoh, ula ong ba ka Sorkar Jylla ka la leh palat shabar ban pynkynriah ia ki hawker na ki surok paidbah sha ki jaka ba la buh kyrpang. “Ki them surok kim dei ban shim ba ka surok ka long ka jaka sah jong ki,” la ong u Bah Lyngdoh haba kren sha ki nongthoh khubor ha ka Sngi Nyngkong.
Ula ong ruh, “Ngi la ai palat u snem tam ban ki pynkynriah noh. Ngi la pynkhreh ia ka jaka ba biang ha MUDA complex, ngi la shna ruh ki jingdonkam. Kane ka dei ka sienjam kaba la leh da ka jingisynei, kaba kawei pat ka sorkar kam ju leh.”
U Bah Lyngdoh u la pyntip ba ka hukum jong ka Iingkashari High Court ka la bthah ban pyndep noh ia ka jingkynriah syndon ia ki hawker shuwa ka 22 tarik mynta u bnai. “Ka High Court ka la bthah ba dei ban pyndep pura haduh ka 22 tarik Naitung bad ngi angnud ba yn ioh ka jingtrei lang jong baroh. Haba la dep, yn pynbeit lut ia kiei kiei ha katei ka jaka.”
U Myntri u la kdew ruh sha ka thong ban pynlong Pedestrian Zone ha ka surok kaba pyniasoh na ka dong rung sha Khyndai Lad haduh Jail Road (ka liang kadiang). “Yn khanglad shuwa ha katei ka surok. Ki nongshong shnong ha katei ka bynta yn ai Pass ban rung ne mih ha ki por ba la buh kyrpang. Ym lah ban iaid laitluid ha man ka por.”
Haba kylli shaphang ki jingkynnoh ba ki jaka ha MUDA complex kim biang, u Bah Lyngdoh u la jubab, “Ka don beit ka jingkynnoh. Ki briew kin don beit kiba sngewthuh bakla. Hynrei ka thong ka dei ban pynlong ia ka surok ka bynta jong u paidbah, ym ba ka dei ka ‘jaka shimet jongno ’ jongno jongno.”
U la ong ruh ba ka Phase-1 jong ka jingpynkynriah ka la sdang bad lada ka long kaba seisoh, yn bteng da kiwei pat ki phase ha ki bynta ba dang sah.