Shillong, 16 Naitung 2025 — Ka kam nongdie madan ha Khyndai Lad ka dang iai iai treikam hapoh ka jingpeit bad ka jingpynbeit jong ka tnad Municipal Shillong bad ka Meghalaya Urban Development Authority (MUDA), lyngba ka jingbthah ba tyngeh na ka Iing Bishar High Court Meghalaya.
Myn ka 16 tarik Naitung, u Special Officer Subhasis Chakrawarty, uba la buh da ka Iing Bishar, u la lum ia ka jingialang ha ophis u Deputy Commissioner Shillong, da ka jingdon lang jong ki nongdie madan, ki bor District, bad ki tnad sorkar. Kane ka la long ka bynta ban peitngor halor ka jingpyndep ia ka hukum ba la pynmih da u Chief Justice I. P. Mukerji bad u Justice W. Diengdoh ha ka 3 tarik Naitung, kaba pynbor ia ki nongdie madan ban sangeh noh ban shim jaka beain ha Khyndai Lad.
Ka tnad Municipal ka la pynlong ruh da ka jingjurip bad dawa na ki nongdie ban pyni ia ki kot ki sla ba pyni ba ki la shong dukan na ka bynta bun snem. Hynrei ka hukum ka ong ba ki nongdie kim dei ban buh jingeh ha ka lynti iaid paidbah, leit ka wan kali, lane pynwit ia ka tnad Pulit ha ka pyniaid jingieng kali.
Ka jingbthah jong ka Iing Bishar ka la kdew shai ba ki nongdie kin hap pynrit ia ka jaka shong dukan katba ka Sorkar ka dang pynkhreh ban ai jaka ba pura ha ka MUDA Parking Lot. Kane ka dei ka jingpyrshang ban wanrah ka jingsuk bad jingbit jingbiang hapoh Khyndai Lad.
Hynrei, ka jinglong jingmut ha Khyndai Lad ka dang iangah. Watla ka sorkar ka la buh “Vending Zone”, hynrei ka jingbud ia kane ka aiñ ka dang duna. Ki dukan die madan kiba shu shong ha surok ki la wanrah jingeh shibun, na ka leit ka wan jong ki kali, ka jingeh ia ki Pulit bad ka PWD, haduh ba kim lah ban trei ia ki kam pynbha surok.
Ka PWD ka ong ba ki nongdie madan ki kyntur jaka surok, ki pynjakhlia bad pynjot ia ki nala, kaba pynwit bha ha ki kam maramot. Kane ka buh jingeh ia ka tnad PWD ban pyndep ia ka kam kaba la buh bynta na ka bynta ka roi ka paar jong ka jylla.
Ka sorkar ka kular ban kyntiew ia ka jingïaroh bad jingitynnad ka jylla, hynrei kata kan urlong tang lada ka paidbah ka shim bynta. Ka jingdonkam ia ka jingïasngewthuh jingmut na ki nongdie madan, bad ruh na ki paidbah paidbah ka long kaba kongsan bha.
Donkam ia Ka sorkar ban leh tyngeh ban pynsangeh ia ki nongdie madan ba pynheh jaka bad dei ban ai ka jingpynshai paidbah bad ka jingbthah ba tyngeh da ka aiñ. Ka jingïatreilang hapdeng ki bor sorkar, ki tnat kum ka PWD, ka Municipal, ka MUDA bad ki nongdie ka long kaba donkam eh ban wanrah ka jingkylla kaba jngai.
Shuh shuh, ka jingïai bteng jong ka jingencroach ha surok ka long ka jingma kaba dang shlur ha sor Shillong. Ka dei ka por ban pynsah jingmut bad kyntu paidbah ban ai bynta, na ka bynta ka lawei kaba khuid, kaba laitluid bad kaba shngaiñ.