Shillong, 17 Naitung 2025 — Ka Synjuk ki Nongñiah Kali Paidbah ha East Khasi Hills hapoh ka jingïalam u Wandonbok Jyrwa ka la pynpaw pyrshah jur ïa ka rai jong ka sorkar jylla ban pynmih thymmai ïa ki Identity Card (ID Card) na ka bynta ki nongñiah kali commercial, bad ruh ïa ka hukum ban pyndait ïa ki High Security Registration Plates (HSRP).
Haba kren sha ki lad pathai khubor, u Jyrwa u la kynthoh tyngeh ïa u Myntri ka tnat jngohkai pyrthei, u Bah Paul Lyngdoh, bad ïa ka Tnad Transport halor kine ki rai kiba u khot kum “ki ain kiba pynpynsniew dur bad khlem jingsngewthuh eiei ïa ka jingeh jong ki nongñiah kali.” U la pynpaw ba kane ka jingthmu ban pynmih ID Card thymmai ka long ka jingpynkharai ïa ki nongñiah kiba la nang ïakynduh jingeh ha ka kam kaba ki trei manla sngi.
“Ngin ym pyrshah ïa ki kyndon aiñ,” la ong u Jyrwa. “Hynrei ka sorkar ka dei ban pynlong shwa ka jingpynsngewthuh paidbah kaba biang, ka jingkren shai bad ka jingkyrshan halor ka rukom pyndep. Ka jingpynmih ID Card thymmai bad ka jingpyntrei kam ïa ka HSRP khlem da ai por lane ka jingïarap ka long ka jingïatyrkhing.”
U la kylli ruh ïa ka nongrim ba ka sorkar ka don ban pynmih da ki ID Card thymmai haba ki nongñiah kali paidbah ki don lypa ïa ki kot ki sla ba treikam bad ba la pdiang da ka Tnad Transport. U la ong ruh ba kane ka rai ka long kaba leh matlah bad ba khlem da peit bniah ïa ka jinglong jingman jong ki nongñiah ha ka kam.
“Ka sorkar ka dei ban sngewthuh ba kane ka jingpynbor ban ïoh da ki ID Card ba thymmai khlem jingkren bad khlem jingsngewthuh ka long ka jingïalam bakla ïa ngi ki nongtrei,” la ong u Jyrwa. “Haba ka sorkar ka lah ban kham peit bniah, ka dei ban pynbha ïa ki surok, thaw jaka shong kali bad pyntrei kam hok ïa ki kyndon dor kali.”
U Jyrwa u la ai jingmaham ba lada ka sorkar kam pdiang ïa ki jingdawa jong ki nongñiah kali, ka synjuk kan sa shim rai ban pynlong da ki jingïakhih lane ban sangeh noh syndon ka jingïaid kali ha ka District. U la kyrpad ïa ka sorkar ban khot jingïalang lang bad ki paidbah ba ktah halor ki kyndon treikam kiba don ka jingïadei bad ka kam transport.
Ka Synjuk ka la dawa ba ka sorkar ka dei ban weng noh mardor ïa ka ID Card ba thymmai bad ban bishar bniah biang ïa ka jingpynbor ban pyndait HSRP, da kaba kdew ba ka ain ne ka jingpynkylla ïa ka rukom treikam ka dei ban shim ïa ka sur jong kiba la shah ktah ha ka pyrkhat lang.