Shillong, 18 Naitung 2025: U President
Ka Hill Farmers’ Union (HFU) u , Bah Commander, ka la pynpaw ïa ka jingsngewkhia kaba jur halor ka jingeh kaba ki nongrep ha jylla ki mad, khamtam kito kiba rep muli (sugarcane).
Haba kren sha ki lad pathai khubor, u Bah Commander u la ong ba ka dor jong u muli ha ki ïew mynta ka la hiar sha tang 3 tyngka shi kilo, kaba buh ki nongrep ha ka jingshah duh kaba shyrkhei. U la ïathuh ba ha kaba pyntreikam ïa ka 1 ton muli, ka jinglut ka poi haduh ₹8000, hynrei ka dor kaba ki nongrep ki ïoh pat ka long tang T. 3000 hadih T. 4000, da kaba shah duh haduh T. 5200 shi ton.
“Ka jingim jong ki nongrep man ka sngi ki iakynduh mawsiang namar ka jinghiar dor ka pynlong ïa ki ban duh mynsiem bad bym don nongrim shuh ban bteng ïa ka rep,” la ong u Bah Commander.
Ki nongrep na kylleng ki thain ruh ki la pynpaw ïa ka jingeh ba ki ïakynduh, ha kaba ki pynpaw ba ka dor jong ki mar rep kam shym la long kaba biang bad ym don ruh ka jingpynkupbor da ki ïew ne ki lad ban die beit sha ki paidbah. Ki la kyntu jur ïa ka sorkar ban: pynbiang noh ïa ka dor (minimum support price) kaba biang,
Shuh ban don ki jaka thied mar rep da ka sorkar lane ki cooperative, na ka bynta ban kyrshan da ka jingïarap pisa lane ki skim kyrpang na ka bynta ki nongrep rep muli bad kiwei ki mar rep ba hiar dor.
Ka HFU ka la bthah ruh ïa ki nongrep ban ïatylli bad wanrah ka sur ba ieng skhem ban dawa ïa ka hok bad jingshaniah ban lah ban bteng ïa ka kam rep kum ka lad im kaba longtrai.