Mawryngkneng, 8 Nailar 2025 —
U BDO ka Mawryngkneng C&RD Block, Bah A. Lyngdoh, u la plie paidbah ïa ka ïew ïadie soh Watermelon ha ophis ka Block, kaba long ka sien kaba nyngkong ban pynlong kum ka ïew kyrpang na ka bynta kane ka soh ba wanrah da ki nongrep na ka shnong Mynriang, East Khasi Hills.
Katei ka sien plie ïew ka long hadien ba ki nongrep ha Mynriang ki la kyntiew bha ïa ka kam rep Watermelon ha kine ki san snem ba la dep, haduh ba mynta ka shnong ka la paw kum ka nuksa ba khraw ha ka rep soh ha ka thain. Ha kane ka sngi plie, ki paidbah bad ki nongwan ïoh die ïoh thied ki la sakhi ba ki nongrep ki wanrah shibun ki Watermelon ba heh ba thymmai.
U Bah A. Lyngdoh u la ong ba ka jingpynlong ïa katei ka ïew ka dei ka thong ban ai lad ïa ki nongrep ba kin ïoh ïadei streit bad ki nongthied, ban pynkiew ïa ka jingioh kamai bad ban kyntiew ruh ïa ka ioh ka kot jong ka shnong. U la ai jingkyrmen ba lyngba ka jingïatreilang hapdeng ka ophis Block, ki shnong bad ki paidbah, ka jingrep soh Watermelon kan nang roi bad kin ïoh ruh ban die sha ki ïew bad ki jaka ba kham jngai.
Ki nongshong shnong Mynriang ki la pynpaw ka jingsngewnguh ïa ka ophis Mawryngkneng Block halor ka jingkyrshan bad ka jingïarap ban pynlong ïa katei ka ïew kum ka lynti ban pynkiew ïa ka kam rep jong ki.