Shillong, 8 Nailar 2025 —
Ka kynhun ki nongrep soh watermelon na shnong Mynriang, hapoh ka jingialam u Bah J.J. Lyngkhoi, ka la sdang ban shim ia ki sienjam thymmai ban kyntiew ia ka kam rep watermelon hadien ka jingjop kaba ki la ioh ban pynlong ia ka iew iathied-iadie watermelon ha Mawryngkneng ha ka sien banyngkong. Kane ka iew ka la pyni shai ba ki soh watermelon na Mynriang ki long kiba bang, ba heh, bad ba ju pan jur ha ki paidbah, kaba la wanrah ruh ia ka jingmyntoi kaba khraw ha ka ioh ka kot jong ki nongrep.
Haba kren bad ki lad pathai khubor ha ophis jong ka Block Mawryngkneng, u Bah J.J. Lyngkhoi u la pynpaw ba ka shalyntem jong ki nongrep watermelon mynta ka long ban pynbun shuh shuh ia ka jingrep, ban kyntiew ia ka rukom trei bad ban nang pynbha ia ka jingpynmih soh, khnang ba ka jingioh ka ban mih na kane ka kam kan kham heh ban ia kaba long mynta. U la ong ruh ba ka thong ka long ban wanrah ia ka Mynriang kum ka centre of excellence ha ka rep watermelon ha East Khasi Hills, bad ban pynpaw ia ka kyrteng jong ka shnong sha ki iew kiba heh hapoh bad shabar ka jylla.
Ha kaba iadei bad kane, ki nongrep ki la pynbna ba ha ka taiew ban wan kin leit ban iakynduh ia u Myntri Rangbah ka jylla, u Conrad K. Sangma, ban rah shakhmat ia ki mat jingdonkam jong ki. Ki mat ba kin pan jingkyrshan ki kynthup:
- Ka jingpynbiang ia ki tiar rep ba thymmai bad kiba paka — kum ki drip irrigation system, ki tiar ban ai um, ki jingpynmih fertilizer bad ki lad ai jinghikai ban kham pynbha ia ka jingmih soh.
- Ka jingpynpoi um bad bording sha ki jaka rep — khnang ba ka jingtrei kan long kaba skhem wat ha ki por lyiur bad por slap bakordor.
- Ka jingshna bad pynbha ia ki surok rung sha ki jaka rep — ban pynjem ia ka jingkit jingbah bad ban pynsuk ia ka jingkit soh sha ki iew.
- Ka jingiarap ha ka jingdie ha ki iew heh bad shabar ka jylla — kum ka jingwanrah ia ki market linkages bad ka jingpynshlur ia ki trai iew ban shim ia ka watermelon na Mynriang kum ka jingdie buh ha ki surok die bah.
- Ka jinghikai ha ka rukom rep ba thymmai — ban pynmih soh shibun ha ka jaka kaba rit, bad ban teh paw ia ka kyrteng Mynriang kum ka jaka rep watermelon ba paw ha jylla bad bar jylla.
U Bah Lyngkhoi u la ong ba lada ka Sorkar ka ai ia ka jingkyrshan kaba pura, kan long ka jingkyrkhu na ka bynta baroh ki nongrep jong ka shnong, bad kane kan nang pynsan ruh ia ka jingshaniah jong ki ha lade khnang ba kim dei ban shaniah tang ha ka rep kynja sngi ne kiwei pat ki kam pynim. U la kdew ruh ba ka kam rep watermelon ka don ka lad ban kylla long ka agro-based industry lada don ka jingpynskhem ia ki lad rep bad lad die.
Ka Mynriang mynta ka la long ka nuksa kaba shai ha ka jinglah ban pynkylla ia ka shnong rit sha ka jaka rep soh ba paw kyrteng, bad ka jingthmu ban pynbun noh ka jingrep bad pynkhlaiñ ia ki lad pynmih kan long ka lynti ban kyntiew shuh shuh ia ka ioh ka kot jong ka shnong bad ban pynlong ia ka kum ka hub jong ka watermelon ha Meghalaya.