Shillong, 19 Nailar 2025 – U President ka Hyntrep National Youth Front (HNYF), u Bah Sadon Blah, u la shim bynta ha ka jingiakhih shong mungor kaba la long hakhmat ka Meghalaya Legislative Assembly, Khyndai Lad, Shillong, kaba la khot da ka North East Students’ Organisation (NESO) ryngkat ka Khasi Students’ Union (KSU) ban pyrshah ia ka jingwan rung bad shong be-aiñ ha ka thain Shatei Lam Mihngi.
U Bah Sadon Blah u la iashim bynta da kaba rah plakad jingthoh kum “No to Illegal Migrants”, “Save Our Land, Save Our Identity” bad “Evict All Migrants from North East” ban pynpaw ia ka jingpyrshah kaba jur.
Haba kren sha ki lad pathai khubor, u Bah Sadon Blah u la ong ba ka jingwan shong be-aiñ ka dei ka jingma ba khraw tam ia ka jylla Meghalaya bad ia kiwei ki jylla ha North East. U la ong shai, “Ym tang ka NESO bad KSU kiba hap ban ialeh, hynrei ngi baroh ki seng samla riewlum ngi dei ban iatylli ban iakhun ryngkat khnang ban iada ia ka hok long trai muluk. Ka jingpynslem jong ka sorkar ka la pynlong ia ka jylla jongngi kum ka jaka riehtngen jong ki nongwan be-aiñ, kaba dei ka jingma kaba shyrkhei tam ia ka lawei jong ngi ki trai ri trai muluk.”
U la bynrap ruh da kaba ong ba ka jingshah iehbeiñ ki jingdawa jong ki riewlum da ki bor sorkar ka pyni ba ki nongmihkhmat paidbah kim shym la shimkhia. “Ngi sngewlyngngoh shibun ban iohi ba ki nongmihkhmat kiba ngi jied da ka jingkyrmen kim shym la kren satia shaphang kane ka jingeh kaba ktah ia ka jinglong trai muluk. Ka jingpynroi ba ki ong kan ym don jingmut lada ngi duh noh ia ka khyndew, ka ktien bad ka jinglong trai jong ngi,” ong u President ka HNYF.
Ka jingiakhih kaba jai jai mynta ka sngi ka pyni ia ka jingpyrshah kaba jur jong ki seng samla pyrshah ia ka jingbym treikam ki aiñ pyrkhing bad ka jingbym shimkhia jong ka sorkar. Ki seng ki pynpaw ruh ba lada ka sorkar jylla bad ka sorkar India kim shimkhia noh mardor, kin nang pynkhlaiñ shuh shuh ia ki jingiakhih haduh ba yn ioh ia ka jingpynbeit kaba pura.