Lada u Syiem u bun jaka palat balei um ai ïa ki Khasi balei thmu sop sop ban die sha ki shipai
Mawkyrwat, Nailar 17:
Ka seng Khasi Students Union South West Khasi Hills District kaba dei ka seng kaba ju peitngor ïa ki jingjia kiba wan lynshop ïa ka jaitbynriew, ha kine ki khyndiat sngi ba la dep ka leit ban ai jingthoh ïa u Syiem ka Hima Maharam ban pyrshah ïa ka jingthmu bad ka jingsuhbuit jong u bad katto katne ki myntri ban die jaka sha ki shipai BSF ka ban kot sha ka 70 Acre eiei ha Photmula kaba hap hapoh ka Ranikor Civil Sub Division, South West Khasi Hills District
Katkum ka kyrwoh khubor na u samla Forwardman Nongrem , President KSU SWKHD u la ong ba ka seng ka pynshai paidbah kdar ba kam lah ban ap haduh ba ‘U Syiem un da la dep die’ , hynrei ka seng ka pyrshah jur shwa ba u Syiem un leh ïa kata namar ba ka seng ka la dep ïoh jingtip ïa ka jingthmu jong u.
U samla Forwardman Nongrem u la ong ruh ba kat kum ka jingpynshai jong u Syiem kata ha ka 15 tarik u Nailar 2025 sha ki lad pathai khubor ba um pat rai hangno ban ai jaka , hynrei ki la tyrwa bun tylli ki jaka ba ki shipai kin jied bad kane ka kam ka dei kajuh kaba ka KSU ka sngewthuh ba u Syiem u mut bad kaba la pynlong ïa ka seng ba kan pynpaw paidbah ba kan pyrshah.
Shuh shuh u la ong ruh ba jingkynnoh ïa ka seng ba kam tip ïa ki jingshisha, ka dei ka juh ka jingshisha ba u Syiem u la thmu ban pynkohnguh ïa ki katto katne ki myntri bad ban pynbieit paidbah da ki jingtyrwa ne ki jingiapeiñ ki bym shongnia ïano ïano ruh.
Ka jingshisha kaba paw hi ka long, ban die ïa ki jaka ka Hima da ki phew Acre ban pynmyntoi ïa u Syiem shimet bad ia ki katto katne ngut, Hynrei ki ban mad ïa ki jingeh ki jingshah-pynwit bad jingshah-pynthud kan long ia ki “Khun – ki hajar” ka Hima Maharam ha ki kam ki jam bad ha ka rep ka riang jong kiba mynta bad ki ban dang wan pateng la pateng.
U samla Forwardman Nongrem u la ong ruh ba ka jingkam jong u wei u myntri ba kim dei ki myndie Ri namar kim pat rai ïa kano ka jaka ban die, ka dei ka jingshisha namar ïa mynta ki dang ïatyrwa ïa ka jaka bad ki dang ïa thlieh-dor bad kin sa die hadien kumba une u myntri ula pynshai hi ha ki lad pathai khubor ha ka 15 tarik u Nailar 2025 ryngkat bad u Syiem.
Kumta Ka KSU ka kren da kaba shai ba lada u Syiem um pat rai, ne u la dep rai, ka seng ka īeng pyrshah ïa jingthmu jong u Syiem bdad katto katne ki myntri jong u bad kan ïai long kaba peitngor bad kan ïeng pyrshah la ka long da kino kino ki lynti .
Ka seng ka kynthoh ruh ïa ka jingkam u syiem ban siew bai lutksan sha ki nongrep ba ka dei ka jingpyrshang ban pynbieit bad ïalam bakla bad ïa kaba kum kane ka seng kan nym lah ban pdiang.
Ka jingong ba ki mut ai jaka ban iohkam iohjam ki samla ka dei ka kamkai kaba ngin nym lah ban pdiang da leilei ruh em namar ba haei ngi iohi ba kiba bun ki khasi ki iohkam iohjam ha Upper Shillong, 7 mer ne kiwei ki jaka shipai haka jylla jongngi.
U samla Forwardman Nongrem u la pynbna paidbah ruh ba kan ïaid beit ïa ka jingialang paitbah haka 20 tarik u Nailar 2025 ( sngi Balang) ha ka por 10:30 mynstep bad ha kato ka sngi u la ong ruh ba ka seng kan sa shim ïa ka rai kaei ban leh nangne shakhmat.