Shillong, 19 Nailar 2025 – Ban pynkhlaiñ shuh shuh ia ka jingpyrkhing bad ka jingphikir ha ki khappud jong ka Ri India bad Bangladesh lyngba ka jylla Meghalaya, ki arngut ki MLA jong ka United Democratic Party (UDP) – u MLA ka Mawsynram, Bah Olan Sing Suiñ, bad u MLA ka Ranikor, Bah Pius Marwein – ki la pynlong ka jingialang kyrpang bad ki bor jong ka Border Security Force (BSF) bad ka Pulit ha katei ka thain ha ka 18 tarik Nailar 2025.
Ha katei ka jingialang, ki heh BSF na ki 16 tylli ki Border Outpost (BOP) naduh Mawsynram haduh Ranikor ki la shim bynta ban iakren halor ka jingkiew ka jingwan rung beaiñ jong ki briew na Bangladesh sha u pud u sam ka India, kaba la pynlong jingma bad jingartatien ha ki paidbah nongshong shnong ka khappud.
U MLA ka Ranikor, Bah Pius Marwein, u la ong ba ka jingialang ka la shah ktien bha halor ki jingeh kiba iakynduh da ki BSF bad ka Pulit bad kumno ki briew na Bangladesh ki lah ban ioh rung laitlan sha India. U la ban ruh ba ki nong wan rung laitlan ki ju leh ia ki kam be-aiñ kumba long tuh, thiem, bad pyntriem ia ki nongshong shnong India.
Na ka liang ki heh BSF ki la pynpaw ia ki jingeh kiba ki iakynduh ha ka jingpahara khappud – kumba long ka jingpra ka jingker sainar, ka jingdon ki wah ba heh, bad ka jingeh jong ka jaka khappud khamtam ha ka por slap. Hynrei, ki BSF ki la kular ba kin ym shong kli kti hynrei kin trei shitom 24 kynta ban khanglad ia ka jingwan rung beaiñ.
U MLA ka Mawsynram, Bah Olan Sing Suiñ, u la ong ba kum ki nongmihkhmat paidbah ki sngewkhia bha halor ka jingkiew ka jingwan rung jong ki nong Bangladesh sha u pud India, khamtam namar ka jinglong jingman ha Bangladesh mynta ka sngi kaba sniew bha. U la kdew ruh ba bun napdeng kito kiba wan rung beaiñ ki wan tang ban wad jingshngain ban im.
U Bah Suiñ u la bynrap ruh ba ka kamram jong ki BSF kam kut tang ha ka jingpyrkhing ia ka jingwan rung beaiñ hynrei ka kynthup ruh ia ka jingpyniaid pyrshah ia ka khaii drok, ka jingwanrah tiar siat bad kiwei ki tiar ialeh. Ki MLA ki la kyntu ia ki BSF ba ha ka jingtalasi bad jingpyrkhing kin long kiba sngewbha bad khlem pynwit ia u paidbah trai shnong, namar ka jingkyrshan u paidbah ka long kaba kongsan eh ha ka rukom treikam jong ki BSF bad Pulit.
“Lada u paidbah um don ka jingshaniah bad jingkyrshan, ka long kaba eh ia ki bor pahara ban trei kam,” ki MLA ki la ong da kaba kyntu ruh ba dei ban don ka rukom treikam kaba khlain bad kaba janai ha ka jingpyniaid khappud.