Shillong, 19 Nailar 2025 – Ka Hynñiewtrep Youth Council (HYC) South West Khasi Hills District hapoh ka jingialam u President ka District, u samla Pynskhem Kharjahrin, ryngkat bad ka HYC Ranikor Circle, ki la leit ban ïa kynduh ïa u Syiem ka Hima Maharam halor ka jingthmu jong u Syiem bad ka Hima ban ai ne die ïa ka jaka kaba long kumba 70 acre sha ki shipai Border Security Force (BSF).
Ha ka jingïakren, u samla Pynskhem Kharjahrin u la pynpaw ba ka HYC SWKHD baroh kawei ryngkat bad ka HYC Ranikor Circle ki ai ka jingkyrshan pura ïa ka KSU SWKHD halor kane ka mat, bad ki ïeng pyrshah jur ïa ka jingthmu jong ka Hima ban ai jaka sha ki shipai BSF.
U Kharjahrin u la kdew ruh ba ki paidbah khamtam kiba sah ha ki khap sor ki dang mad jingeh namar ka jingduna nongrim ïing, bad bunsien ki hap ban shong ïingwai, hynrei ka Hima bad u Syiem kim shym la pyrkhat ban ai bynta jaka sha kine ki briew. “Lada ki don bun jaka, ki dei ban ai bynta lem ïa ki para doh para snam kiba duk basuk ban ïoh nongrim ïing,” ong u President ka HYC.
Shuh shuh u la ong ba lada ka Hima bad u Syiem ki mut ban die ne ai ïa kane ka jaka sha ki shipai BSF, ki dei ban khot ïa ka public hearing khnang ban tip ïa ka rai jong ki khun ki hajar ka Hima. U la ong ba katkum ka jingïohi jong ki seng bhalang, kam don jingkyrshan eiei na ka bynta ban ai jaka sha ki shipai BSF.