Shillong, 22 Nailar 2025 – Ki nonghikai skul hapoh ka lama jong ka All Meghalaya Primary School Teachers’ Association (APSTA) ki la ïaid paidbah na Jail Road shaduh Golf Link Dorbar Shnong ban dawa na ka Sorkar ba kan pynurlong noh ïa ki jingdawa kiba slem bad ban weng ïa ki rai kiba ki ong ba pynjot ïa ka jingim kamai kajih jong ki.
Ha kane ka jingïakhih, ki nonghikai ki la rah plakad bad ki jingthoh kum “No to MEG”, “We serve Education not agreements” bad “Save posts, secure the future”. Ki la pynpaw ruh ka jingpyrshah kaba jur ïa ka Mission Education Grant (MEG) bad ïa ka jingthmu ka sorkar ban privatise ïa ki skul.
Ka APSTA ka la dawa ruh ba ka Sorkar ka dei ban pyllait mardor ïa ka 46% bad 49% ka Arrears Dearness Allowance (D.A.), namar ka jingbym siew ka la ktah jur ïa ka jingim bad ka jingtreikam jong ki nonghikai. “Ka jinghikai kam dei tang ka kamram kamai pisa, hynrei ka long ka jingai jingim ban ai jingshai ha ka pule puthi. Ka Sorkar ka dei ban pynneh ïa ka jingshngaiñ bad ka jingsdang ïa ki nonghikai, ym ban pynhap ïa ki ha ka jingeh,” ong ki nongialam jong ka seng.
U Babu Shullai u pynsngew jingialang ki jingdawa:
Ban pynneh ïa ki deficit posts bad ym ban weng noh, ban shai ki jingpynmih hukum.
Ban pynpaw paidbah ïa ka rukom trei jong ka MEG.
Ban khang ïa ki SMC bad GB na ka jingtrei khlem peitbniahBan pynshai halor ka rukom trei ka Contributed Provident Fund (CPF) ha SBI Laitumkhrah.
Ban pynlut noh ïa ki jaka thylli nonghikai, khamtam ha ki subject Khasi bad Garo.
Ban pynlong jingïakren paidbah shuwa ban pynksan ïa ka MoU bad ka Mother’s Union, Tura.
U President ka APSTA, F.C. Shullai, u la kyntu ïa ka Sorkar ba kan shimkhia da ka jingshisha bad jingpynpaw paidbah ïa baroh ki bynta. U la ong ba lada ka Sorkar ka dang khlem shimkhia, ki nonghikai kin hap ban nang iai mih paidbah ban pynsngew ïa ka jingeh jong ki.