Shillong, 10 Nailur 2025 – Ha ka sngi ba lai jong ka Autumn Session jong ka Iingdorbar Thawaiñ Meghalaya, u MLA ka Nongkrem Bah Ardent Miller Basaiawmoit u la wanrah ka jingïatai halor ka Shillong Smart City Mission, da kaba u buh jingkylli ïa u Myntri ka tnad Urban Affairs uba dei ruh u Symbud Myntri Rangbah ka jylla Bah Sniawbhalang Dhar.
U Bah Ardent u la kdew ba ka thong ba nyngkong jong ka Smart City kaba la sdang ha u snem 2015 ka dei ban pynbha ïa ki bynta kum ka jingsumar, ka pule puthi, ki public services, ka jingshong shngain bad ka jingpynneh pynsah ïa ka mariang. Hynrei u ong, ym lah ban ïohi ïa ki projek kiba pynpaw ïa kine ki jingthmu, hynrei ka sorkar ka shu kynthup tang ha ka jingtei ïa ki commercial complex.
U MLA u la dawa ruh ïa ki jingtip bniah halor ka jingpynmih bad buh ïa ki open-air gym, da kaba pan ïa ka jingtip shaphang ki jaka ba la buh bad ka jinglut jingsep baroh kawei. U la buh jingkylli ruh halor ka jingkiew shaphrang jong ki projek kiba la thep hapoh ka Mission, khamtam eh halor ka commercial complex ha Polo kaba la slem ban trei kam. U la kylli ruh katno ki dukan kin don bad lada ki kam kiba la dep ki la leit hapoh ka quality audit.
Ha ka jubab, u Symbud Myntri Rangbah Dhar u la ong ba ka jingeh ka don ha ka rukom tendering ban leit pynïaid ïa ka complex. Ha ka sien kaba nyngkong, ka sorkar ka la pyrshang ban ai sha uwei u nongshna tang kawei ka building, hynrei namar bym don nongpan, mynta ka sorkar ka dang pyrkhat ban ai tender da ka floor lane da ka dukan. U Dhar u la ong ruh ba namar ba kane ka dei ka projek komersi ba la kyrshan da ka Sorkar Pdeng bad Jylla, ka hap ban ïaid lyngba ka rukom tender ba shai bad ba khuid ban pynmih ïa ka jingmyntoi pisa ba bun tam.
Haba ïoh ban jubab ïa ka jingmaham jong u Ardent ba kane ka rukom trei kam ka lah ban ïapher na ka thong jong ka Smart City, u Dhar u la ong ba ka Mission kam dei tang ïa ki complex, hynrei ka kynthup ruh ïa ka infrastructure, ka jingpynbiang ka repor ka sorkar lyngba ka teknologi bad ki lad kamai kajih. U la kdew ruh ba ka kamai kajih kam shym la kut tang ha uwei u projek, hynrei ka sorkar lyngba kiwei pat ki skim ka la pynmih bun ki lad ban ai jingsumar ka kamai kajih.
“Kane ka complex ka dei tang shi bynta jong ka Smart City Mission. Ka pisa kaba ka sorkar kan ïoh na kane kan lah ban pynlut biang sha kiwei ki bynta jong ka roi ka par bad ka jingiarap ïa ki paidbah,” ong u Dhar ha iingdorbar.