Shillong, 28 Tarik Risaw 2025 — U Managing Director ka JETS 24×7, u Pynskhemlang W. Uriah u la ai da ka jingthoh sha u Chief Executive Officer (CEO) ka Shillong Municipal Board ban ujor pyrshah ïa ka kompani Rapido halor ka jingkynnoh ba ka la pastai be-aiñ ïa ki poster, hoarding, flex bad banner hapoh ki jaka municipal khlem da ïoh jingbit na ka tnat Municipal.
U Uriah ha ka dorkhas jongu u kdew ba kane ka jingtreikam ka Rapido ka long pyrshah ïa ki kyndon Municipal deilang bad ka jingbym shym la ïoh jingbit na ka SMB. U la kyrpad ruh ba ki bor pynïaid ka Municipal kin shimkhia mardor, kin tohkit bad leh da ka jingbishar aiñ halor kane ka jingjia khnang ban ïada na ki jingtrei be-aiñ ha sor Shillong.
La pyntip ruh ba ka kopi kane ka dorkhas la phah sha u Myntri ka tnat Urban Affairs, u Sniawbhalang Dhar bad sha u MLA ka 17-North Shillong, u Adelbert Nongrum ban khmih kyrpang ïa kane ka kam.
Ha kajuh ka por, ka jingtip lyngba ka RTI kaba la pynmih da ka Shillong Municipal Board ha ka 13 tarik Risaw 2025 ka pynshai ba ka SMB kam shym la ai jingbit eiei sha ka Rapido ban pastai poster, hoarding, flex lane banner hapoh ki jaka ba hap ha ka Municipal. Kane ka pynpaw pyrkhat ba ka jingtrei ka Rapido ha ka sor ka lah ban kynthup ïa ki kam be-aiñ.
Ki paidbah ki la pynpaw ka jingbynñiaw bad dawa ba ka Municipal Board bad ka Sorkar jylla kin shimkhia mardor ïa kane ka kyndon ban khanglad ia kino kino ki kompani na ka jingpynkhein aiñ bad pynjaboh ïa ka jingitynnad bad ka rukom pynneh pynsah ïa ka sor Shillong.