MEGHALAYA : Ka Meghalaya Pradesh Congress Committee (MPCC) hapoh ka jinglamkhmat ka Deborah C. Marak, Working President bad Manuel Badwar, Secretary MPCC, ka la pynlong jingialang bad ki nongthoh khubor ha Congress Bhavan, Shillong ban pynbna ïa ka campaign “Safeguard Your Vote, Secure Your Future.”
Ka Marak bad u Badwar ki la ong ba ka Congress Party ka pynlong ïa kane ka signature campaign ha ri baroh kawei ban pyrshah ïa ka jingpynban jur ïa ka jingdon ki vote thok bad ka jingshah teh mrad ka synshar paidbah ha ka BJP. Ki la ong ruh ba ka Congress ka la shimkhia bha ïa ka jingpynkhein ïa ka jingkhuid jong ka jingjied paidbah ha ki jylla kum ka Haryana, Madhya Pradesh, Chhattisgarh bad Maharashtra.
Ha Meghalaya, ka party ka la ïoh lum palat 10,000 signature, bad ka campaign ka dang ïaid shaphrang ha ki distrik bad ki blok bapher bapher.
“Ka synshar paidbah ka dei ka nongrim jong ka ri. Lymda ngi sumar ïa ka, ka lawei jong ngi baroh kan duh noh,” la ong ka Deborah Marak, da kaba kyrpad ïa ki paidbah ba kin long kiba tip bad kiba khuid ha ka por thep vote.
U Badwar u la ong ruh ba ha ka jingialang bad u Chief Electoral Officer (CEO) ka jylla, ka Congress ka la ai jingmut ban ai bor kham bun ïa ki Dorbar Shnong ban peit ïa ka jingthep kyrteng thymmai, namar ka jylla kam don ïa ka Panchayati Raj kum kiwei ki jylla.
Ka Congress ka la pynpaw ruh ka jingsngewskhem ba kan bteng ban ïakhun na ka bynta ka jingshisha ha ka thep vote bad ka jingkhuid ka jingthep kyrteng paidbah.
“Ka jingmut paidbah mynta ka la kham kylla. Ki briew ki la sdang ban sngewthuh ba ka Congress ka dang long ka party kaba ïeng na ka bynta ka synshar paidbah,” la ong ka Marak.
Ka campaign “Safeguard Your Vote, Secure Your Future” kan dang bteng ha baroh ki jaka jong ka jylla ha ki bnai ki ban wan.