Shillong 19 Naiwieng – U Symbud Myntri Rangbah ka Jylla, Bah Sniawbhalang Dhar, ula pyntip ba ka Sorkar Jylla kan shimti pura ban bahkhlieh ïa ka jinglut jingsep bad ka jingsumar jong ki arngut ki samla kiba mynsaw jur ha ka jingjia shah tynrah kali kaba jia ha NEHU.
Ia kane ula pynbna hadien ba u la leit jngoh mynne ka nohphai sngi, 19 tarik Naiwieng 2025, sha Nazareth Hospital, Shillong, ban peit bniah ïaka jingkoit jingkhiah jong ki nongshah tynrah.
Haba kren sha ki lad pathai khubor, u Bah Sñiewbhalang u la ong ba lada ka jingdonkam ka long ban phah sumar shabar na ka jylla ne shabar na ka ri, ka Sorkar kan shimti shisha ïa baroh ki jingkitkhlieh khnang ba ki samla kin ioh jingiarap kaba biang nadong shadong.
Kumba la lap, ki ar ngut kiba mynsaw ki dei ki samla pule ka skulbah NEHU — ka samla Stephaniely Shadap bad ka samla Daritngen Pohdukhei — kiba shah tynrah da kawei ka kali haduh ban da mynsaw jur ha ka miet 17 tarik hapoh ka NEHU Campus, Gate-2.
U Symbud Myntri Rangbah u la pynpaw ruh ka jingsngewkhia kaba jur bad u la kular ba ka Sorkar kan buddien halor kane ka jingjia bad kan ai jingkyrshan haduh kaba kut sha ki iing ki sem jong ki samla.