Shillong, 20 Naiwieng 2025 : Ki nongñiah trok cement kiba hapoh ka Meghalaya Commercial Truck Owners & Drivers Association (MCTODA) ki la ngat ha ka jingeh kaba khraw hadien ka jingshah bom-tied ki dkhot jong ki ha ka jingiakhih ba dang jia ha Mawryngkneng. Kiba la mynsaw kynthup ia Bah Banshemstar Mawthoh na Mawryngkneng, Ma Yoomi Sutnga bad Planmiki Rabon Rtiang, kiba la ioh jingmynsaw na ka jingpynbor ki pulit Meghalaya.
Ha ka jingïakynduh jong ka MCTODA bad ki lad pathai khubor ha Shillong Press Club hapoh ka jingialam u Moseslandar Marngar, ka seng ka pynbna ba hadien ka jingïatai bad ki riew shemphang, ka la shim ia ka rai ban ym leit ujor FIR ne ban leit sha ka Human Rights Commission halor ka jingjia.
Katkum u president, la ong ba bun ki briew ki la buh jingmut ba ka seng ka dei ban ujor pyrshah ia ki pulit bad ki magistrate kiba don bynta ha ka jingpynshitom. Hynrei ka seng ka la shim ia ka rai ba ka aiñ lada trei, kin shah ktah tang ki para Khasi bad Garo kiba trei kum ki pulit bad ki ophisar ha kata ka sngi. Kane, katkum ka seng, kan nang pynkhlaiñ ia ka jingïapher hapdeng ki paidbah bad ki bor synshar.
U Moseslandar Marngar u la pynpaw ruh ba ki nongñiah kiba mynsaw ki la shah bom tam ha ki shipai non-tribal forces, kiba ki paidbah ju khot kum ki CRPF. U la kynnoh ba kane ka jingshah pynshitom ka paw shai ba ki cement factory ki la pawbor palat, la ong ruh ba ki la don ka jingpynkhih bor wat ha ki jingïalang ha ophis DC ha ka por ba dang ia shong bishar ia ka jingeh ki nongñiah.
Ka MCTODA ka pynpaw ba kane ka jingjia ka la wanrah ka jingsngewkhia halor ka jingpynwanrah ka jingïapyrshah hapdeng ki paidbah bad ki ophisar Khasi–Garo, bad kumta ka seng ka ai ka rai ban long ka jingïakren kaba jai jai bad ban wad lad da ki lynti ba shai ha ka aiñ bad ka hok.