MEGHALAYA : Ka Hynniewtrep Youth Council (HYC) hapoh ka jingialam u President Rangbah, Bah Roykupar Synrem, ka la leit ban iakynduh ia u DIG ka CBI, u Promod Manjhi, hadien ba ka seng ka la ioh jingtip ba don ka jingtei ha phyllaw ophis ka CBI kaba la pynkhih jingmut paidbah ba kadei ka jaka mane Blei.
Haba kren sha ki nongthoh khubor, u Bah Roykupar u la ong ba ka seng ka dei ban pan jingpynshai halor kane, namar ki don ki jingkynnoh ba ka jingtei ka la kiar shapoh ka rukom seiñ synshar jong ka jylla.
U la ong ba u Promod Manjhi u la pynshai shai ba ka CBI kam shna jaka mane Blei, hynrei ka Community Hall, ban pyndonkam da ki nongtrei bad ki briew kiba sah ha katei ka thaw. U Manjhi u la pynpaw ruh ba kane ka jingtei ka long ban myntoi paidbah bad ym dei ban shim jubor ia ki jingpyrkhat bakla.
Haba jubab halor ki jingartatien, u Bah Roykupar Synrem u la maham tyngeh ba lada ka jingtei kan kylla sha ka jaka mane Blei, ka HYC kam banse ban leh da ki sienjam kiba tyngeh ban pynneh ia ka hok long shnong.
Ki nongialam ka HYC bad ki ophisar ka CBI ki la leit jngoh lang ia katei ka jingtei ban lap bniah bad ban pynthikna shuh shuh ia ka jingmut jingpyrkhat jong ka tnad.