UKRAINE : Ka jingpynbor ban poi noh sha ka jingiasuk bad ban pynkut noh ïa ka thma ha Ukraine ka la poi mynta ha ka por kaba eh bha, katba ki nongïakren ki dang pyrshang ban thoh biang ïa ka jingtyrwa ïasuk jong ka America kaba la pyntieng biang ïa ka Kyiv bad ki nongbah ba heh jong ka Europe.
Kaei kaba la sdang kum ka draft kaba don 28 tylli ki mat ba la wanrah da ka sorkar jong u Trump ha ka taiew ba la dep, mynta la pynrit biang bad la pynbeit ha Geneva, ha kaba ki jingbym ïahap jingmut ki kynthup ïa ki jingai jaka, ki jingpynbeit ïa ka jingïada ha ki por ban sa wan, ka jingpynbeit ïa ki shipai jong ka Ukraine, bad ka jingpynïaid ïa ki marpoh khyndew jong ka Russia kiba la shah pynsangeh shabar ri.
U President ka Ukraine, U Volodymyr Zelenskyy, u la kam ha ka sngi Nyngkong ba kitei ki mat ka lah ban don jingkylla noh hadien ka jingïathir jingmut ha Switzerland, da kaba kdew ba ka rukom treikam mynta ka kynthup ïa ki bynta kiba dei. Hynrei u la kdew ba ïa ki mat kiba kham eh yn sa ïakren tang ha ki jingïakren jong u bad u President jong ka America, u Donald Trump.
Hadien ki jingïalang ha Geneva ha ka sngi U Blei, ki nongmihkhmat jong ka US bad Ukraine ki la pynbna ïa ka jingpynwandur ïa kaei kaba ki la khot ka “jingpynbeit ïa ka jingsuk.”
Watla ki la kiar na kaban ïasam ïa ki jingtip ba kyrpang, ki heh kiba tip bha ïa ka rukom treikam ki la batai ïa ki jingpyrshang ban pynduna ïa ka jingdon jong ki point, ban pynbeit da ka jingiakkren, bad ban pynrung ïa ki jingai jingmut na ka ri ukraine bad ki ri na Europe kiba la pyrshah jur ïa ka jingpynbeit thymmai jong ka America.
U Zelenskyy u la ong ba ka kynhun jong u ka la pyntip lyngkot ïa u ha ka sngi Nyngkong shaphang ki sienjam ba la pynthymmai, da kaba khot ïa ki jingpynkylla ka rukom treikam kaba dei.
Ha kajuh ka por, u nongïalam ka Ukraine u la maham ïa ki paidbah ba kin long kiba husiar namar la khmih lynti ba ki jinghiar thma jong ka Russia kin dang ïai bteng ha kine ki sngi.
Kumba u la ong, “ym dei ban don ki missile, ym dei ban don ki jingshah thombor kiba jur ïa ka Ukraine bad ïa ki briew jong ngi” lada ki jingïakren ïasuk kin ïaid shakhmat, da kaba bynrap ba ban khanglad ïa kum kine ki jingshah thombor ka donkam ïa ka jingïadon bynta lang jong “kito kiba khlaiñ bor ha ka pyrthei.”
Ha ka jingthoh jong u Trump ha ka Truth Social, u la thoh, “Hato ka lah shisha ban don ka jingkiew kaba khraw ha ka jingïakren ïasuk hapdeng ka Russia bad ka Ukraine ? Wat ngeit haduh ba phin da ïohi ïa ka, hynrei kaei kaei kaba bha ka lah ban jia.”
Haba pyllait jingtip napoh White House, lyngba ka nongaiktien ka Karoline Leavitt ka la pynpaw ba tang ar tylli ki mat bym ïahap jingmut ki dang sah khlem bad khlem pat lah ban ia pynbeit bad pynpaw ba ka jingshaniah na baroh arliang ki lah ban weng ïa kita ki jingïapher jingmut.