GOA : Myn ha ka sngi u blei kawei ka night club kaba don ha Goa bad bala tip kyrteng ia ka da ka Birch by Romeo Lane, ka la kala kem ding kynsan kynsan ha kaba haduh mynta la ioh jingtip ba 25 ngut ki briew kiba don hapoh jong ka tei ka nightclub kila iap ei bad bun ngut kiba la mynsaw jur namar ka jingbam jong ka ding kaba la jur bha kaba la pynjot thiaw ia katei ka night club. Ki briew ba dei peit halor ka koit ka khiah bad kiba la poi ha baroh sawdong jong katei ka jingjia, ki la pyni ba ka jingring mynsiem ïa ka lyer kaba sniew bad ka jingduna jong ka oxygen sha ka 50 haduh 80% ka dei ruh kawei na ka daw ba kitei ki briew kila iap.
Ha ka por ba ka ding ka la bthei nyngkong eh ha Birch by Romeo Lane la suba ba ka jingbthei ka lah ban dei na ka jingbthei jong ka tyndong gas. Hynrei ki jingtohkit ba nyngkong bad kumjuh ka jingïathuh jong ki briew ki la pynpaw ba dei ki jingpynbthei ding kiba la pynbthei hi hapoh jong katei ka klob kaba la pynlong ïa katei ka jingpluh.
Katei ka jingpluh kaba la pyniap ia 25 ngut ki briew ha katei ka jaka lehkai miet ha Goa, ka la pyni biang sa shisien ia ki kam beain, ryngkat bad ka jingbym lah jong ki heh sorkar ban pyntreikam ia ki kyndon. Ka FIR ba la mudui da ki pulit Goa ka la ong ba ki briew kiba shah kynnoh, kiba dei ki trai, ki paralok, ki nongpynïaid, ki nongpynïaid ïa ki jingïalang bad kiwei kiwei ki nongpynïaid jong ka Birch by Romeo Lane, ki khlem da shimkhia bad husiar bha, khlem da pynbiang ïa ki tiar ïada ding bad kiwei kiwei ki tiar ïada. watla ki don ka jingtip kaba pura ba ka jingpynlong ïa kum katei ka show ka lah ban wanrah ïa ki jingjia ba shyrkhei ha ka ding.
Kat kum ka FIR ka la bynrap ba katei ka jaka bam kam don ka jingkhang ban mih kyrkieh ha ka mala ba shapoh bad kumjuh ruh ha ka mala ba halor ban mih kyrkieh lada jia ba don ka jingjia ba kyrkieh”. Ia katei ka Nightclub la lap ruh ba ka treikam khlem da ïoh jingbit bad laisen na ki bor ba dei peit.
U director ka tnad pynlip ding, u Nitin Raiker, u la iathuh ha ka Times of India, “Katkum ki jingthoh, katei ka jaka kam shym la ioh ia ka NOC kaba biang na ka tnad pynlip ding, kaba pyni ia ka jingbym bud ryntih ia ki kyndon ba donkam ban iada.
Katkum ka jingong jong ki, katei ka nightclub ka duna bha ha ki kor pynlip ding, ka jingbym buh ia ki kor pyntuid um lada jia kano kano ka jingpluh ding ba kan mih hi, ka jingbym don ki kor pynmih tdem bad ki kor pynhiar mynsiem ha ki jaka ba shapoh, bad ka jingbym biang ki lynti ban mih kyrkieh,.
Bun na kiba la lait im ki la kdew ba katei ka jaka lehkai miet ha Goa ka don ka don ia ka jaka rung jaka mih kaba rit bha, kaba la wanrah ia ka jingkulmar ha ka por ba ka ding kala sdang ban bthei.
Katkum ka jingong jong u president jong ka Arpora, U la pynpaw ba ki bor synshar shnong ki la hukum ban pynpra noh ïa katei ka klob, hynrei ïa katei ka rai la pynkylla noh da ka sorkar jylla. “Ngi la lap ba ki don ki jingtei bym bud ryntih kiba la pynkheiñ ïa ki kyndon shna ïing bad ki kyndon jingïada. Ki heh jong ka panchayat ki la pynlong ïa ka jingjurip bad ai hukum ban pynpra noh. Hynrei, ki trai ki la ujor pyrshah ïa katei ka hukum sha ka Directorate jong ki Panchayat.