Shillong Kyllalyngkot – u Bah Chaltbha Muksor, u nongshong shnong ka Lad Rymbai (Dong Pohktieh), East Jaintia Hills District, Meghalaya, uba la jingïoh jingïathuh paidbah mynshwa ba u la jah rngai, la lap noh ïa u bad u long mynta ha ka jingshngaiñ.
U Bah Chaltbha u la mih na shnong ha ka 02 tarik Kyllalyngkot 2026 ha ka por kumba 11 baje mynmiet, da ka jingthmu ban leit trei sha Bengaluru lyngba ka rel. Ka jaka ba khatduh eh ba la ïoh jingïathuh ïa u ka long ha Jolarpettai Junction Railway Station, Tamil Nadu, ha ka 05 tarik Kyllalyngkot 2026 ha ka por kumba 6 baje mynstep, hadien kata pat la duh jingïakren namar ba ka mobile phone jong u ka la lip noh.
Hadien ka jingpyrshang jingïatreilang kaba bteng bad ka jingïasnoh jingïadei bad bun ki bynta, la lap ïa u Bah Chaltbha ha Government Medical College & Hospital, Krishnagiri, Tamil Nadu. Mynta u don ha ka jingshngaiñ bad u la shah sumar bad peit jingïada hapoh ka jingïakhlain jong ka Khasi Students’ Union (KSU), Bengaluru Unit.
Hadien ba ka KSU West Jaintia Hills Unit ryngkat bad ka ïing ka sem ki la ïathuh sha ka KSU Bengaluru Unit ba u Bah Chaltbha u la jah ha Tamil Nadu, ka KSU Bengaluru Unit ka la sdang mardor ban sam paidbah ïa ki poster bad jingïathuh paidbah lyngba ki social media ha Bengaluru bad Tamil Nadu. Hadien kata, ka Krishnagiri Police Station ka la phone sha u Bah Donboklang Nongphud, President ka KSU Bengaluru Unit, ban pyntip ba u Bah Chaltbha Muksor u la shah lap da ka jingmynsaw bad la pynrung sumar ïa u ha Government Medical College & Hospital, Krishnagiri, ha ka 08 tarik Kyllalyngkot 2026 ha ka por kumba 3 baje janmiet.
Mardor hadien ba la ïoh ïa kane ka jingïathuh, ki nongmihkhmat ka KSU Bengaluru Unit ba kynthup ïa u Bah Donboklang Nongphud (President), Bah Meban Plielad Shadap (Advisor), Bah Younidame Suchiang (General Secretary) bad Bah Pyndap Umsong (Assistant General Secretary) ki la leit sha Krishnagiri ban peit ïa ka jinglong jingman jong u. La pynshisha ba u Bah Chaltbha u la shah mynsiem ha ka kjat bad u don ha ka jinglong jingman kaba duna bor, hynrei mynta u long ha ka jingshngaiñ bad u la shah peit bad sumar bha.
Ka ïing ka sem jong u Bah Chaltbha Muksor ryngkat bad ka KSU Bengaluru Unit ki pynpaw ïa ka jingsngewnguh kaba khraw ïa u SP bad SI ka Krishnagiri Police Station na ka bynta ka jingïarap kaba kloi bad ka jingïatreilang kaba bha. Ki ai ruh ka jingsngewnguh ïa ki bor pynïaid hospital bad ïa baroh ki briew kiba la ïa bynta lang ha ka jingïarap ban lap ïa u Bah Chaltbha Muksor.
La kyrpad ïa ki paidbah paidbah ba kin sangeh noh ban pynsaphriang ïa ka jingïathuh paidbah jong ka jingjah rngai ba mynshwa, hynrei ban sam pynban ïa kane ka jingïathuh ba thymmai khnang ba ka jingtip kaba dei ka jingïoh jingïadei sha baroh kiba donkam.
