Kyntait ki nongñiah kali kamai ban pyndait GPS ai ki kali sorkar kin pyrshang nyngkong

Shillong, 13 Kyllalyngkot 2026:Ka Joint Coordination Committee of Commercial Vehicles of Meghalaya, kaba la ialam da u Bah Wandonbok Jyrwa kum u Convener, ka la pan jingpynshai na ka Tnad Transport halor ka jingpynbor ban pynieng bad ban pyndonkam ia ki GPS device ha ki taxi, ki bus bad kiwei pat ki kali kamai ha ka jylla.
Ka Committee ka la ong ba ha ki jinglong jingman kiba mynta, ka jingpynieng bad ka jingpyndonkam hok ia ki GPS device ha ki kali kamai kam long kaba lah ban pyntreikam da kaba suk. Ia kine ki jingeh la pynpaw ha ka jingïakynduh bad u Commissioner ka Tnad Transport ha Sawlad.
Katkum ka jingong jong ka Committee, bun ki jingeh ki don, naduh ki kam pyntreikam, ki jingeh teknikal bad ka jingeh ha ka liang ka pisa, kiba pynlong ia ki nongniah kali bad ki trai kali kamai ba kin shem shitom ban kohnguh ia katei ka kyndon GPS. Ka Committee ka la pyntip ruh ba ki bor sorkar ki la pdiang ia ki jingeh ba la pynpaw ha katei ka jingïakynduh bad ki la kular ba kin bishar bniah ia ka kam.
Ka Joint Coordination Committee of Commercial Vehicles ka la kren shai ba kam pyrshah ia ki jingpynkylla ne ki lad jingïada paidbah, hynrei ka pynsngew ba kano kano ka polisi ne ka jingpynbor paidbah ka dei ban peit ia ki jinglong jingshem jingshitom jong ki nongtrei bad ki nongniah kali kamai ha kylleng ka jylla. Ka Committee ka la kyrpad ruh ia ka sorkar ba shuwa ban pynbor ha ki kali paidbah, kan sdang nyngkong da ka jingpyntreikam ia ka GPS ha ki kali sorkar, khnang ba yn lah ban peit ia ka jingtreikam bad ki jingeh ha ka jingïaid shaphrang.