Shillong, 27 tarik Kyllalyngkot: Ka jingïakhih ba shi sngi jong ki nongtrei bank ha ka ri baroh kawei ka la jop bad ka la ktah bha, la ong u Bah Wanraplang Mawroh, Convener jong ka United Forum of Bank Unions (UFBU), Meghalaya State Unit, haba u la kren sha ki lad pathai khubor ha ka sngi Ba-ar.
U Bah Mawroh u la ong ba kane ka jingïakhih ka la pynpaw shai ïa ka jingïatylli jong ki nongtrei bank ha ka ri baroh kawei, khlem jingïapher bank ne jylla, ban wanrah lang ïa ki jingdawa kiba la sahkut la bun snem ha ka bynta jong ka banking sector. U la pynshai ruh ba kane ka jingïakhih kam long ban ktah ïa u paidbah hynrei ban pynsngewthuh ïa ka Sorkar Pdeng halor ki jingdawa kiba ym pat pyndep jong ki nongtrei bank.
U la kdew ba ki nongtrei bank ki la mad ïa ka jingbun palat ka kam, ka jingduna ka duna briew bad ka jingkhia ka kam, katba bun ki jingïapynbeit kiba donkam eh ki dang sahkut. Kane ka jingïakhih, u la ong, ka la phah ïa ka khubor kaba khlaiñ ba ka jingïatylli ka dang dei hi.
Ha kajuh ka por, u Bah Brayan Syiemlieh, Vice President jong ka SBI SC/ST Employees Welfare Association, North East Circle, u la ong ba ïa kane ka jingïakhih la pynlong khamtam eh ban pynbor ïa ka Sorkar Pdeng ban pyntreikam ïa, kaba la dep ïa mynjur ha u snem 2023 hynrei kaba dang sahkut la kumba lai snem.
U la pynkynmaw ruh ba ki nongtrei bank ki la don bynta kaba khraw bha ha ka por jong ka jingïapher COVID-19, ha kaba ki la buhrieh ïa la ka jingim ban pynthikna ba ki jingshakri banking kin dang ïaid beit, hynrei haduh mynta ki jingdawa hok jong ki dang sah jingïaleh.