Shillong, 19 Rymphang 2026: Ha ka Budget Session jong ka Meghalaya Legislative Assembly ha ka sngi Balang, 18 Rymphang, bun ki mat jingïakren paidbah ki la long halor ki kam aiñ kum ka ILP bad ka Meghalaya Residents Safety and Security Act (MRSSA).
Hynrei, katto katne ki jingkylli kiba ktah jur ïa ka jingshngaiñ jong ki paidbah, khamtam eh ïa ki khynnah rit bad ki kynthei, ki la shah leh bym biang bad shah iehnoh ha ka Question Hour.
U MLA na Mawryngkneng Konstituensi, Bah Heavingstone Kharpran (Voice of the People Party – VPP), u la buh jingkylli ha iing dorbar halor ki jingïap ki khyllung khynnah ha Nongrah, kiba la pynsngewsih ïa ka shnong bad ïa ka jylla hi baroh kawei.
U Bah Heavingstone Kharpran u la kylli ïa u Symbud Myntri Rangbah ba khmih ïa ka Tnad Home (Police), Bah Prestone Tynsong, halor ka jingïaid jingïtohkit jong ki ar tylli ki mukotduma murder case ha Nongrah.
U MLA u la ong ba kine ki jingjia ki la pynmih ïa ka jingsheptieng bad ka jingbym shngaiñ ha ki paidbah, khamtam haba jingïadei bad ki khynnah bad ki kynthei.
Ka Murder Case jong ka (L) Insaphira L. Mawnai
U MLA u la kylli ia ka sorkar bad ka tnad pulit halor ka jingïap jong ka (L) Insaphira L. Mawnai, nongshong shnong ka Nongrah, kaba la jia ha ka 14 tarik Nailar 2025.
Ha ka jubab hapoh ka iing dorbar, ba la ai da u Bah Prestone Tynsong u la ong:
La register ïa ka case ha Rynjah Police Station bad ka Aiñ kanïaid lynti katkum ka aiñ. Ka tnad pulit ka pynlong ïa ka jingtohkit bniah bad la aiti ïa ka Detailed Investigation Report (DIR) sha ka Juvenile Justice Board, Shillong
U la pyntip ruh ba kane ka case mynta ka dang hapoh ka jingïbishar (sub judice).
Ha ka jingjia jong u Kyrshanbor Kharmudai u Bah Kharpran u la buh jingkylli ruh halor ka jingïap jong u Kyrshanbor Kharmudai, kaba la jia ha ka 7 tarik Risaw 2025.
Ka jubab na u Symbud Myntri Rangbah ba la ai ha ka jingthoh ba la register mukotduma (case) mar mar hadien ba la ïoh jingïtip namar ka jingjur jong ka kam, la thaw ïa ka Special Investigation Team (SIT) ban leh ïa baroh ki jingtohkit katkum ka aiñ bad ka case mynta ka dang ïaid hapoh jingïtohkit
U MLA u pynpaw jingsngewsih bad pynrem ïa ka jingpynslem
Hadien ka jingbym ioh ban iatai ha ha iing dorbar, u Bah Heavingstone Kharpran u la kren sha ki lad pathai khubor, da kaba pynpaw ïa ka jingsngewsih kaba jur halor kine ki jingjia.
U la ong ba ha kine ki bnai ba la dep, ki la don ki jingjia ba sngewsih ha Nongrah, ha kaba ar ngut ki khynnah rit ki la duh noh ïa la ka jingim ha ki riew thrang snam.
U MLA u la ai jingïaroh ïa ki longïing jong ki lanot, hynrei u la pynrem ïa ka sorkar bad ïa ka tnad pulit namar ka jingpynslem ban pynsted ïa ka jingbishar bad ban ai hok sha ki lanot.
U la ong ba:“Ka jingshngaiñ jong ki khynnah bad ki kynthei kam dei ban shah iehnoh. Ka sorkar ka dei ban shimkhia kham sted bad ban pynthikna ba ki lanot kin ïoh jingïada bad hok.”
U Bah Kharpran u la kyntu ïa ka sorkar jylla ba: kan pynsted ïa ka jingtohkit
Kan ai jingïada ïa ki longïing jong ki lanot
Kan pynthikna ba ki kam jingïap briew kim dei ban sahkut hynrei kin poi sha ka jingïapher katkum ka aiñ.
Bad ban shimkhia ïa ki mat jingïada ïa ki khynnah bad ki kynthei ha ka jylla
Kane ka jingjia ka pyni ba wat hapdeng ki jingïakren politik bad ki jingïatai aiñ, ki mat shaphang ka jingshngaiñ paidbah khamtam ïa ki khynnah bad ki kynthei, ki dang donkam jingïakheiñ kyrpang hapoh ka jylla Meghalaya.