Shillong, Rymphang 25: MLA ka Khliehriat Constituency ha East Jaiñtia Hills District, Kyrmen Shylla, u la pynpaw ka jingsngewnguh bad ka jingïaroh ïa ka Sorkar Jylla halor ka Budget 2026-27, da kaba ong ba kane ka budget ka long ka sienjam kaba skhem ban kyntiew ïa ka roi ka par jong ki paidbah ha ka jylla.
Haba shim bynta ha ka jingïatai halor ka General Budget ha ka sngi kaba phra jong ka Dorbar Mang Tyngka ha Meghalaya Legislative Assembly, u Kyrmen u la ban jur halor ka jingdonkam ban pynkhlaiñ ïa ka scientific mining khnang ban ai jingïada ïa ki trai ri trai muluk bad ban bud ïa ka rai jong ka Supreme Court of India kaba la mih ha u Naitung 2019.
U la ong ba ka jingai laisen ïa ki katto katne ki par dewïong ha East Jaiñtia Hills ka dei ka dak ba ka sorkar ka la sdang ban pyndep ïa ka jingangnud jong ki paidbah hadien ki snem kiba bun jong ka jingïakhun. Hynrei, u la kyrpad ïa ka sorkar ba kan ïa treilang bad ka Sorkar Pdeng ban pynduna ïa ka minimum area requirement na ka bynta ka scientific mining khnang ba ki rit paid trai jylla ruh kin ioh bynta.
U MLA u la ai khublei kyrpang ïa ka Sorkar Pdeng bad ïa ka jingïalam jong ka sorkar jylla halor ka jingmang pisa T.70.14 klur na ka bynta ka surok ba 40.18 kilometre kynthup ïa ka jingkieng kaba heh halor ka Wah Myntdu kaba pynïasoh sha National Highway 6.
Katkum ka jingong jong u, kane ka projek kan pynsuk shibun ïa ka leit ka wan, kan kyntiew ïa ka ïoh ka kot bad kan pynjan ïa ki shnong sha ki surokbah.
U Kyrmen u la ban jur ruh ba ka rep ka ri ka dei ka “lifeline” jong ki nongrep. U la kdew ba ka jingmang pisa T.664 klur na ka bynta ka Agriculture Sector kan iarap ban pynheh ïa ka jingthung strawberry, ban pynkhlaiñ ïa ka irrigation bad ban kyntiew ïa ka jingïoh jingïarap ha ki thaiñ nongkyndong.
Ha kajuh ka por, u la ai jingiaroh ïa ka jingmang pisa: T.257 klur na ka bynta ka Animal HusbandryT.130 klur na ka bynta ka Fisheries
Kine kin plie lad ïa ki seng jingïarap self-help group bad ki samla shnong ban thaw kam thaw jam.
Tourism bad ki Waterfall kum ki World-Class Destination
Ha ka liang ka jngohkai pyrthei, u MLA u la kdew ba ka jingmang pisa T.375 klur kan kyntiew ïa ki jaka jngohkai kum ki waterfall bad ki bynta riti dustur ban long ki jaka kiba pawnam ha ka pyrthei. Kane kan kyntiew ïa ka ïoh ka kot jong ki nongshong shnong bad ki nongshna tiar riti dustur.
U la pynpaw ruh ka jingkyrshan ïa ka 10-Day Homestay Scheme ba la wanrah da u Myntri Rangbah Conrad K. Sangma, da kaba ong ba kane kan ai kam ai jam ïa ki longïing bad ban pynurlong ïa ka jingkiew ka jingïoh jong ka tourism ha jylla.
Ka Thup Mission bad ka Jingtei ïa ki Samla
U Kyrmen Shylla u la ban jur ruh halor ka jingïada ïa ka mariang, da kaba ong ba dei ban bud ïa ka “polluter pays principle” na ka bynta ka jingpynbha ïa ka khyndew bad ka um.
U la kyrpad ruh ban kynthup ïa ki nongbylla par dewïong kum ki nongioh jingmyntoi hapoh ka Mahatma Gandhi National Rural Employment Guarantee Act (MGNREGA) ha ki por ba kim donkam treikam, khnang ban pynduna ïa ka jingbym donkam bad ban ai jingïarap ha ka jingpynbha ïa ka mariang.
Ha kaba kut, u MLA u la ong ba kane ka Budget kam dei tang ka jingpynbna pisa hynrei ka dei ka jingïohi jngai ban wanrah ïa ka roi ka par, ka jingpynkhlaiñ ïa ka rep ka ri, ka scientific mining bad ka jngohkai pyrthei – ka lynti sha ka Meghalaya kaba kham roi bad kham kiew shaphrang