Shillong, Rymphang 25, 2026: Ka Hynniewtrep Integrated Territorial Organization (HITO) kala ujor paidbah sha Officer-in-Charge jong ka Sadar Police Station, Shillong, halor ka jingkynnoh ba don ka jingkren paidbah kaba long kum ka hate speech bad kaba lah ban wanrah jingkulmar hapdeng ki jaitbynriew.
Ha ka shithi kaba la thoh ha ka 25 tarik Rymphang 2026, ka HITO kala pynpaw ïa ka jingsngewsih bad jingbitar halor ka video ha YouTube kaba kyrteng “Watch my speech in Meghalaya’s Khasi Tribal Language in Indigenous Faith Conference” ba la kren da u nongïalam BJP u Sunil Deodhar.
Katkum ka HITO, ha katei ka video la don ki jingkren kiba pynsniew dur ïa ka histori bad ka kolshor jong ka jaitbynriew Khasi-Pnar bad kiba lah ban wanrah jingïapait jingïapra, khamtam pyrshah ïa kiba kam trai ïa ka niam Khristan.
Ka seng kala ong ba ki jingkren kiba la pynpaw ha katei ka video ki long kiba pynbakla bad kiba pynmynsaw ïa ka jingsngew jong kiba bun ki paidbah, bad ki lah ban ktah ïa ka jingïatylli bad ka jingïalong paidbah ha jylla. Ka HITO kala kdew ruh ba kum ka ri kaba bud ïa ka nongrim secular, ka India ka burom ïa baroh ki niam, bad kino kino ki jingkren kiba pynjah burom ïa kawei pat ka niam ki lah ban wanrah jingkulmar ha ka imlang sahlang.
Shuh shuh, ka seng kala pynpaw ka jingsngewkhia halor ki jingkren kiba ïadei bad ki riewniam, kynthup ïa U Jisu Khrist, bad kala ong ba kino kino ki jingkren kiba pynjah burom ïa ki jingngeit ba kyntang ki lah ban pynjur ïa ka jingïapher bad pynmynsaw ïa ka jingsngew paidbah.
Ka HITO kala kyntu ïa ki bor pulit ba kin tohkit bniah ïa kane ka bynta bad ban shim ïa ki sienjam katkum ka aiñ ban pynneh ïa ka shongsuk shongsain bad jingïatylli ha jylla.
Haduh ba la thoh ïa kane ka khubor, ym pat don kano kano ka jingkren paidbah na ki bor pulit halor katei ka jingujor.
