Shillong, 23 Lber: Ka World Water Day la rakhe da ka jingthmu ban pynsngewthuh paidbah ha Bharat Nirman Rajeev Gandhi Seva Kendra Building ha Mawdiangdiang, hapoh AEC Mawpat C&RD Block, kaba la pynlong da ka tnad Public Health Engineering (PHE).
Haba kren ha kane ka sngi, u Myntri ba khmih ïa ka tnad Water Resources jong ka Sorkar Meghalaya u la ban jur halor ka jingdonkam kaba kongsan jong ka um ha ka jingim briew. U la ong ba ka um ka long kaba kordor tam ban ïa ka ksiar namar ka um ka ai jingim, katba ka ksiar wat la ka dor ka rem hynrei kam lah ban ai jingim ïa u briew.
U Myntri u la kyrpad ïa ka Sorkar Jylla, ki Dorbar Shnong, ki skul bad paidbah baroh ba kin shim lang ïa ka jingkitkhlieh ban sumar bad pynneh pynsah ïa ka um. U la ong ba ka jingpynsngewthuh paidbah bad ka jingpyniaid hok ïa ka um ka long kaba donkam ban pynthikna ba baroh kin ïoh ïa ka um bam um dih kaba khuid bad kaba biang.
U la bynrap ruh ba “Ka um ka dei ka jingim,” bad lada ym don um, ym don jingïaid shaphrang jong ka jingim. Kumta, u paidbah u dei ban sumar ïa ka um kumba sumar ïa ki mar kiba kordor.
Ha kane ka prokram la ïashim bynta da san tylli ki shnong, kiba kynthup ïa ka Mawkasiang, Mawdiangdiang, Madan Saisiej, Diengiong bad Umroh. Ki khynnah skul bad ki nonghikai na Sharon Memorial School, Mawdiangdiang bad Mawkasiang ki la ïashim bynta shitrhem ha kane ka sngi.
Ha kane ka jingïalang, ki ophisar bad ki engineer na ka tnad PHE ki la kren halor ka jingdonkam ban pynneh ïa ka um, ban sumar ïa ka jingkhuid jingsuba bad ban pyndonkam hok ïa ka um. Ki la kyntu ruh ïa paidbah ban kiar na ka jingpyndonkam bakla bad ban pynneh ïa ka um na bynta ka lawei.
