U Myntri Rangbah ka jylla u Conrad Sangma mynta ka sngi u la pyllait paidbah ia ka website kaba dei na ka bynta ban pynsted ia ki jingtreikam jong ka sorkar ia kaba la tip kum ka Meghalaya State Public Services Delivery Commission (MSPSDC)
Kane ka website kan khmih halor ka jingpyntreikam ia ka hok jong ki paidbah halor ki jingiadei ia ki kam bad ka sorkar bad kan long ruh kum ka jingkieng na ka bynta ban pynsted ia ki jingtreikam kiba dei ban ai ka jingshakri ia ki paidbah.
Na ka liang jong u Myntri Rangbah ka jylla u Conrad Sangma u la ong ba kane ka dei ka thong jong ka sorkar ban pynbha ia ka rukom treikam jong ka sorkar bad khamtam ban pyndep ia ki kam hapoh ka por kaba deiban pyndep na ka bynta ka jingdonkam jong ki paidbah.
U Conrad u la ai jingiaroh ia ka Meghalaya State Public Services Delivery Commission bad kumjuh ruh ia ka NIC Meghalaya halor ka jinglah ban pyndep ia kane ka website kaba dei ban ai jingshakri ia ki paidbah.