NEW DELHI: U Myntri Rangbah duh ka ri U Narendra Modi haba kren ha ka sngi rakhe laitluid jong ka Ri India u la kynthoh jur halor ka sain pyrthei bala synshar da ki shiiing ar iing da kaba ong ba kane ka pynduh noh ia sap ka phong jong kiwei pat bad ka ialam ruh sha ka bamsap.
“Ka dei ka kamram jongngi ban pynthikna ba kito kiba la lute na Ri ki dei ban siew pat” la ong u Modi uba la bynrap ruh ba nalor ka jingiakhun ban rat dyngkhong ia ka jingduk donkam ruh ban iakhun pyrshah ia ka bamsap.
Haba kren ia ka jingrakhe dap 75 snem jong ka jinglaitluid jong ka ri na Red Fort, Delhi U Narendra Modi u la kyrpad ia ki samla ban aiti na ka bynta ban kyntiew ia ka ri ha ki 25 snem ban wan bad u la ong ruh ba ka sorkar kan trei na ka bynta ka roi ka par jong ki paidbah kata tad haduh u snem 2047.
U la ong ba ha u snem 2047 ka Ri India ka dei ban long ka ri kaba la roi la par, ban weng na ki rukom shah synhshar mraw, ban sarong ia ki jingioh pateng, ka jingiatylli bad ban pyndep ia la ka jong ka kamram.
U Modi u la ai burom ia ruh ia ki nongiakhun laitluid jong ka Ri India da kaba kdew ia u Mahatma Gandhi, Bhagat Singh, Rajguru, Ramprasad Bismil, Ashfaqullah Khan, Rani Laxmi Bai, Subash Chandra Bose, Tatya Tope nalor kiwei kiwei.
Haba kdew halor ka jingwah lama ha ki iing ki sem u Modi u la ong ba ka dei ka dak jong ka jingialong kawei bad ka jingkysiew thiah. U la ong ba kiwei pat ki ri ka pyrthei ki peit ia ka India kum ka jingsngew sarong bad kum kawei na ki Ri kaba lah ban pynbeit ia ki jingeh.
Haba kdew halor ka polisi kaba thymmai na ka bynta ka pule puthi u Modi u la ong ba ka thong ka long na ka bynta ban hikai pyntbit ha ki kam bapher bapher ban wanrah ia ka jingkhlain bad ban lait na ka jinglong mraw.