Pyllait im i khyllung ba la tep im haduh 8 kynta ha Mawhati; ong u doktor ka dei ka kam phyllaShillong, 1 Jymmang 2026:

Ia i khyllung ba dang shu kha, ïa uba la pynpoi sha Mawhati PHC da ki nonghikai skul bad ki nongkitkam shnong na ka thaiñ Mawhati, Ri Bhoi District, la ioh ban sumar mardor da ki doktor bad ki nos katba lah ban leh ïa kaba donkam, ong u Dr. C. Dhar jong ka Mawhati PHC.
Haba kren sha ki lad pathai khubor, u Dr. Dhar u la pyntip ba i khyllung i la wan poi ha ka jylla ba jaboh bha bad la tap khyndew, kaba la jia ha ka 27 tarik u Ïaïong. U la ong ba ha ka por ba wanrah ïa i khyllung, i dang don mynsiem hynrei i la jot bha ka met, hynrei dei da ka jingïarap jong U Blei ba i la lah ban khih bad im hadien ba la tep im haduh kumba 8 kynta.
Katkum ka kaiphot ba la ioh na ka PHC Mawhati, la batai ba ka jingjia ka la jia ha ka por kumba 5 baje mynstep ha kaba la kha ïa i khyllung, bad hadien kata ha ka por 6 baje mynstep la leh ïa ka kam ban tep im ïa i. I khyllung i la shah jynjar haduh kumba 8 kynta shuwa ban ioh jingïarap.
Ki doktor bad ki nos ha Mawhati PHC ki la leh ïa kaba lah ban pynim ïa i, bad hadien kata la phah noh ïa i sha Civil Hospital Nongpoh lyngba ka jingïarap jong ka 108 ambulance ban ioh jingïarap kaba kham biang.
Mynta, katkum ka jingïathuh u doktor, i khyllung i dang don hapoh ka jingïakhmih kaba bniah hynrei i la sdang ban khih bad ioh jingkyrmen ban im.
Halor ka kmie jong i khyllung, la pyntip ba ka la shah ithuh bad la wanrah sha Mawhati PHC ban ioh jingïarap ha ka liang ka jingsumar kynthei. Ka bynta jong ka jingïakhmih ïa ka la don ruh hapoh ka jingïatreilang bad ka Tnad Social Welfare bad ki pulit.
U Dr. Dhar u la pynkut da kaba ong ba kane ka jingim kaba dang lah ban pynneh ïa i khyllung ka dei shisha ka “kam phylla jong U Blei.”